NITONG nakaraang ilang araw ay napabalitang nakakaaninaw na ng liwanag ang ating mga awtoridad kung sino ang pumaslang kila Bokal Ramil Capistrano, ng Provincial League of Barangays, at sa driver nito, nang pagbabarilin ang kanilang kinalululanang Mitsubishi Montero, sa kahabaan ng Service Road sa Barangay Ligas, City of Malolos.
Batay sa ulat, nakipagsanib pwersa din ang kapulisan kila Bulacan Gov. Daniel R. Fernando at Vice Gov. Alex C. Castro, upang lutasin ang nakaririmarim na pagpatay, kamakailan. Ipinagsakdal na ni P/Col Satur Ediong, Provincial Director ng Bulacan Police Provincial Office sa City Prosecutor’s Office ng nabanggit na Lungsod ang apat (4) na suspects sa pagpaslang kay Bokal Capistrano at sa drayber nito.
Nakababahala na ang ganitong pangyayari na posibleng madagdagan pa, at may mga masasawing buhay, ito ay kung hindi lubusang mabibigyan ng atensyon ang peace and order sa nasabing Lalawigan. Sa ating nakalap na impormasyon, nagpahayag ng matinding pagkabahala si Gov. Fernando hinggil sa tumataas na insidente ng mga pagpatay sa kanyang nasasakupan, na binibigyang-diin ang pangangailangan para sa komprehensibong paraan upang matugunan ang isyu.
Kinondena niya ang karahasan at nanawagan para sa pagkakaisa sa mga yunit ng lokal na pamahalaan, mga ahensyang nagpapatupad ng batas, at mga miyembro ng komunidad upang epektibong labanan ang krimen. Binigyang-diin ni Fernando na ang mga pamamaslang na ito ay hindi lamang nagbabanta sa kaligtasan ng publiko kundi nakasisira din sa kapayapaan at kaayusan, bilang pangunahing elemento na kinakailangan para sa napapanatiling pag-unlad ng nabanggit na Lalawigan.
Ang pagtutok ng kanyang Administrasyon sa pakikipagtulungan, pagtugon sa mga ugat ng krimen, at pagpapahusay ng pakikipag-ugnayan sa komunidad ay nagpapakita ng kanyang dedikasyon sa paglikha ng mapayapang kapaligirang nakatutulong sa paglago.
Dahil dito, hinimok niya ang mga awtoridad na paigtingin ang kanilang mga pagsisikap sa pag-iimbestiga sa krimeng ito, at pagtiyak ng hustisya para sa mga biktima habang nagsusulong din ng mga hakbang sa pag-iwas upang hadlangan ang karahasan sa hinaharap.
Tsk! Tsk! Tsk! Naniniwala tayo na ang kapayapaan at kaayusan ay mahalaga, dahil direktang nakakaapekto ang mga ito sa pag-unlad ng ekonomiya, katatagan ng lipunan, kagalingan ng komunidad, at higit sa lahat sa buhay ng bawat Bulakenyo. Hanggang sa muli. (UnliNews Online)
