LUNGSOD NG MALOLOS — May kabuuang P2000.000 cash reward o pabuya ang ibibigay sa sinumang makapagbibigay ng impormasyon na maaaring humantong sa pag-aresto sa isang suspek na pumatay sa dalawang operatiba ng pulisya sa isang anti-illegal drug operations sa Bulacan noong Sabado (March 8).
Ayon kay Brig. Gen. Gen. Jean Fajardo, PRO3 police director, ipinagluluksa ng puwersa ng Philippine National Police (PNP) ang pagkamatay nina Staff Sergeants Dennis Cudiamat at Gian George Dela Cruz, kapwa ng Bocaue Municipal Police Station.
Sinabi ni Fajardo na nagsasagawa ng manhunt ang mga pulis ng PRO-3 upang mahanap si alyas Xander. Naaresto naman sa follow-up operation ang isa pang suspek na si Dado.
“Naglabas kami (PRO-3) ng reward na P100,000 habang nagbigay din ng P100,000 reward ang LGU ng Bocaue sa sinumang makakapagbigay ng impormasyon sa posibleng kinaroroonan nitong si alyas Xander na maaaring makapagturo sa atin at maaresto natin ito sa lalong madaling panahon ,” ani Fajardo.
Hinimok ni Fajardo ang publiko na makipagtulungan para sa agarang pagkakaaresto sa natitirang suspek.
Matatandaang nagsasagawa ng buy bust operations sina Cudiamat at Dela Cruz sa Sitio Tugatog, NIA Road sa Barangay Tambubong noong Sabado ng tanghali (March 8) nang paputukan sila ng mga armadong lalaki.
Namatay si Cudiamat sa tama ng bala sa ulo habang binawian ng buhay si Dela Cruz sa ospital.
Tiniyak ng PNP sa mga pamilya nina Cudiamat at Dela Cruz na mabibigyan ng hustisya at nagsasagawa na ng buong imbestigasyon.
“Walang humpay na hahabulin ng PNP ang lahat ng responsable sa karumal-dumal na pag-atakeng ito. Hindi tayo magpapahinga hangga’t hindi nabibigyan ng hustisya. Ang karahasan na ito laban sa ating mga tauhan ay hindi mawawalan ng parusa at sisiguraduhin natin na ang buong puwersa ng batas ay ibababa sa mga may kasalanan,” ani Fajardo.
“Kami ay nagdadalamhati sa malagim na pagkamatay ng ating magigiting na mga operatiba ng pulisya na nag-alay ng kanilang buhay sa paglilingkod at pagprotekta sa publiko. Ang aming mga iniisip at panalangin ay kasama ng kanilang mga pamilya, at tinitiyak namin sa kanila ang aming suporta sa mahirap na panahong ito. Hinding-hindi malilimutan ang kanilang tapang at sakripisyo,” dagdag pa ni Fajardo. (UnliNews Online)
