SAN MIGUEL, Bulacan — Ipinagdiwang sa harap ng tahanan ng bayaning si Col. Simon Tecson sa San Miguel, Bulacan ang Ika-21 Taong Anibersaryo ng Pagkakaibigang Pilipino-Espanyol at Ika-125 Taong Anibersaryo ng Pagsisimula ng Pagkubkob sa Baler.
Sentro ng pagdiriwang ang pagkilala sa natatangi at makataong pamamaraan ni Col. Tecson, para mapasuko ang huling pwersa ng Espanya na nagkakanlong sa simbahan ng Baler sa Tayabas na ngayo’y sakop na ng lalawigan ng Aurora.
Ayon kay National Historical Commission of the Philippines o NHCP Chairman Emmanuel Franco Calairo, limang pwersa ng mga rebolusyonaryong Pilipino ang ipinadala ni Pangulong Emilio Aguinaldo sa Baler para pasukuin ang mga Kastila.
Ang ikalimang pwersa sa ilalim ni Col. Tecson, kasama ang mga rebolusyonaryong taga-San Miguel, San Ildefonso at Baliwag ang matagumpay na nakapagpasuko sa pwersang Espanyol matapos ang 337 na pagkakanlong sa nasabing simbahan.
Ito’y sa pamamagitan ng pagpapadala ng mga pagkain at inumin. Ang mapayapang pagsuko ay nagbunsod upang pahintulutan sila ni Pangulong Aguinaldo na ligtas na makaluwas sa Maynila upang makauwi na sa Espanya.
Kaya’t para kay San Miguel Mayor Roderick Tiongson, hindi maituturing na pagpapasuko lamang ang ginawa ni Col. Tecson kundi isang pagkupkop sa mga Kastila na halos mamatay na sa gutom at sakit. Simbulo aniya ito ng pagpapamalas ng pag-ibig at pagpapatawad sa mga naging kaaway.
Kinikilala naman ng Espanyol na si Senyor Javier Galvan, direktor ng Instituto Cervantes de Manila ang naging paniniwala, determinasyon at ipinaglaban ng koronel para sa Pilipinas na naging simulain na maging kaibigan ang dating magkaaway.
Inalala rin ni Senyor Galvan na ang makasaysayang pangyayaring ito sa tinaguriang Pagkubkob sa Baler o kilala sa tawag na ‘Siege of Baler’, ay naging batayan ng noo’y Pangulong Gloria Macapagal Arroyo upang ipapasa sa 12th Congress ang Republic Act 9187 noong Pebrero 5, 2003.
Ito ang nagdedeklara sa petsang Hunyo 30 bilang Araw ng Pagkakaibigang Pilipino-Espanyol o Philippine-Spanish Friendship Day.
Binigyang diin ni Senyor Galvan na para lalong mapalakas ang pagkakaibigan ng Pilipinas at Espanya, kailangang paigtingin ang pag-iral ng diplomatikong relasyon sa larangan ng people-to-people exchanges, economic and commercial relations at ang tourism and cultural cooperation.
Para sa people-to-people exchanges, ibinalita ng direktor na aabot sa 200 na mga Pilipinong guro taun-taon ang dumarating sa Espanya upang magtrabaho bilang guro sa wikang Ingles.
Isinusulong naman nitong Instituto Cervantes de Manila na gawing pilot area ang Bulacan upang makapagsanay ng mga guro sa Foreign Language at maging sa Araling Panlipunan, na matutong magsalita at sumulat sa wikang Espanyol.
Sila rin ang gagawing tagapagturo sa mga mag-aaral sa planong pagbabalik ng pagtuturo ng wikang Espanyol sa asignaturang Foreign Language.
Sinabi rin ni Senyor Galvan na patunay ng masiglang ugnayang pang-ekonomiya at komersiyo ng Pilipinas at Espanya ang tuluy-tuloy na paglahok ng mga Espanyol na mamumuhunan sa iba’t ibang larangan o aspetong pang-ekonomiya, depensa, transportasyon at imprastraktura.
Hinalimbawa niya ang pagsusuplay ng mga bagong bagon ng tren ng Construcciones y Auxiliar de Ferrocarriles o CAF para sa Light Rail Transit o LRT Capacity Expansion and Cavite Extension Project.
Gayundin ang paglahok ng Espanyol na konstratistang Acciona, S.A sa mga pangunahing proyektong imprastratura sa Pilipinas gaya ng pagtatayo ng istraktura ng Cebu-Cordova Link Expressway Project o CCLEX, mga contract packages ng North-South Commuter Railway o NSCR Project Phase 2 o linya mula Malolos hanggang Clark at ang NSCR South Commuter Line Project nito.
Iba pa rito ang pagsusuplay ng Construcciones Aeronauticas SA para sa ngayo’y pito nang C-295 Medium-Lift Aircraft ng Philippine Air Force bilang bahagi ng New Armed Forces of the Philippines o AFP Modernization Program.
Kaugnay nito, mag-oorganisa ang Instituto Cervantes de Manila sa tulong ng Embajada de Espanya en Filipinas ng serye ng mga tours sa mga pamana at makasaysayang lugar partikular sa Bulacan. Ito’y upang magkaroon ng simulain na maging regular ang pagbisita ng mga turistang Espanyol sa lalawigan at iba pang destinasyon sa bansa.
Samantala, umaasa rin si Senyor Galvan na matuloy ang planong pagbisita sa Pilipinas ni Haring Felipe VI. Magkakaroon sana ng pagbisita noong nakaraang pagdiriwang at paggunita ng Quincentennial ng Pag-Ikot ng Sangkatauhan sa Daigdig, ngunit hindi natuloy dahil sa pandemya.
Magiging karangalan din aniya ng kanyang bansa kung makakapagsagawa ng isang state visit si Pangulong Ferdinand Romualdez Marcos Jr. sa Espanya upang lalong pag-ibayuhin ang ugnayan at diplomatikong relasyon ng dalawang bansa. (UnliNews Online)
Source: PIA Bulacan
