PLARIDEL, Bulacan — Patay ang isang lalaki habang malubha ang kaibigan nito matapos pagbabarilin ng mga ‘di pa nakikilalang salarin sa Plaridel-Pulilan Diversion Road, Brgy. Banga 2nd ng nabanggit na bayan nu’ng Sabado (Aug. 5).
Base sa ulat ng Plaridel police, kinilala ang namatay na suspek na si Alvin Narciso, residente ng Sitio Dike, Brgy. Banga 2nd, Plaridel habang nasa malubhang kalagayan ang kasama nito na si Jeric Galvez, ng sitio Bacood, Brgy. Parulan, Plaridel.
Sa inisyal na pagsisiyasat ng kapulisan, bandang 1:40 ng madaling araw nu’ng Sabado ng mapansin ng isang Janito Samontañes ang mga biktima at ang mga suspek na kinabibilangan ng dalawang lalaki at isang babae na may pinagtatalunan.
Dahil sa matinding pagtatalo ay nabaril ng isa sa mga suspek ang mga biktima gamit ang bitbit na caliber .45 na naging sanhi ng pagkamatay ni Narciso habang malubhang naitakbo ang kasama nito sa Medical Center, sa City of Malolos, para malapatan ng agarang lunas.
Makaraan ng pamamaril ay mabilis na tumakas ang mga suspek lulan ng isang Suzuki Shogun 125 motorcycle papunta sa direkson ng Cagayan Valley Road .
Patuloy naman sa kasalukuyan ang isinasagawang imbestigasyon at follow-up operation ang Plaridel police upang maaresto ang mga salarin at papanagutin sa naganap na pamamaril. (UnliNews Online)
