CALOOCAN CITY — Ipinagpatuloy ng Department of Health, kasama si First Lady Liza Araneta-Marcos at ang iba pang National Government Agencies (NGAs) kaugnay na ahensya ang paghahatid ng kalidad na serbisyong pangkalusugan sa pamamagitan LAB for ALL caravan sa Barangay Bagumbong sa nabanggit na lungsod nu’ng Martes (Aug. 29).
Kabilang sa serbisyong dala ng LAB for ALL ay libreng konsultasyon para sa pediatrics, obstetrics, gynecology, ECG, dental extraction, minor surgeries, eye check-up, family planning, HIV at STI, at iba pa.
Ang caravan na ito ay inisyatibo ng administrasyong Marcos upang magpaabot ng libreng serbisyong pangkalusugan kagaya ng pamamahagi ng libreng mga gamot at konsultasyon para sa pediatrics, obstetrics, gynecology, ECG, dental extraction, minor surgeries, eye check-up, family planning, at HIV and STI consultation at iba pa.
Bukod sa DOH, dumalo rin sa paglulunsad ng LAB for ALL ang iba pang mga ahensya ng gobyerno gaya ng Department of Social Welfare and Development (DSWD), Technical Education and Skills Development Authority (TESDA), Food and Drug Administration (FDA), Philippine Health Insurance Corporation (PhilHealth) at lokal na pamahalaang lungsod ng Caloocan. Nakasama rin ng pampublikong sektor ang ilan sa mga katuwang sa pribadong sektor na kaisa sa mithiing makapaghatid ng kalidad na serbisyong pangkalusugan.
“Saan mang sulok ng bansa ilunsad ang LAB for All, makaaasang laging ipababatid ng DOH ang suporta nito upang mas maramdaman ng bawat Pilipino ang pangangalagang pangkalusugan tungo sa Healthy Pilipinas… kung saan Bawat Buhay ay Mahalaga!” ani ni Health Secretary Teodoro Herbosa. (UnliNews Online)
