LUNGSOD NG MALOLOS, Bulacan — Nagsagawa nang tree planting cum wellness program ang DepEd-ALS at City Environment and Natural Resources Office (CENRO) noong nakaraang Friday (Feb. 23).
Nagtanim ng kabuuang tatlumpung (30) samplings na binubuo ng labinlimang (15) Caballero Tree at labinlimang (15) Narra Tree sa Malolos Recovery Facility sa Barangay Mambog.
Bahagi ng nasabing programa ang pagsasagawa ng Zumba na layuning mapanatili ang malusog na pangangatawan ng bawat indibidwal.
Sa mensahe ni SDS Leilani Samson Cunanan, CESO V, nagpahayag siya ng lubos na pasasalamat sa Pamahalaang Lungsod ng Malolos sa patuloy na pagsuporta sa mga programa at gawain ng DepEd Malolos hindi lamang sa pang-edukasyon kundi pati na rin sa pangkalikasan.
Ayon naman kay Salvador Lozano, EPS I – AP – ALS Malolos Focal Person, ipinahayag niya ang kanyang kasiyahan sa pagbabalik sa MRF at pagiging bahagi ng isang programa na nagtataguyod ng kaayusan sa kalikasan.
Ipinahayag naman ni Amiel S. Cruz, OIC-Supervising Environment Management Specialist (CENRO), na ang pangangalaga sa kalikasan ay kaakibat ng kalusugan na patuloy na isinusulong ng kanilang tanggapan.
“Let’s make Malolos a Green City!” ani Cruz. (UnliNews Online)
