BOCAUE, Bulacan — Pinuri ni Senador Joel Villanueva ang pagpapalawak ng Joni Villanueva General Hospital (JVGH) at ang pagpapaganda ng mga mahahalagang pasilidad na magtataas sa ospital sa Level 2 status sa Disyembre 2024.
Pinasinayaan ni Villanueva, kasama ang mga lokal na opisyal at mga hospital executive, ang ikatlong palapag ng JVGH, kung saan makikita ang tatlong operating rooms, five-bed intensive care unit (ICU), isang surgical ICU, at isang medical ICU.
“Ito po sana ang mga kwarto na gugustuhin natin na walang laman. Pero sa mga hindi maiiwasang pagkakataon, ito rin po ang kwarto na sasagip sa buhay ng ating mga kababayan,” pahayag ni Villanueva.
“Bulakenyos and other patients in need of emergency care will no longer have to travel far. The upgrade and expansion of JVGH aim to provide immediate life-saving interventions accessible to our people,” dagdag pa niya.
Nasaksihan ni Villanueva ang pagpirma ng isang Memorandum of Agreement (MOA) sa pagitan ng JVGH at maraming bayan sa Bulacan para sa pagpapatupad ng Medical Assistance to Indigent Patients (MAIP) program na nagkakahalaga ng P20 milyon.
Ang pitong munisipalidad na makikinabang sa programa ay ang Bocaue, Guiguinto, Hagonoy, Marilao, Obando, Pandi, at Plaridel.
Dumalo sa MOA signing sina Department of Health (DOH) Region 3 Director Corazon Flores, Bulacan 5th District Representative Ambrosio “Boy” Cruz Jr., Obando Mayor Ding Valeda, Plaridel Mayor Jocell Vistan, Norzagaray Mayor Merlyn Germar, at JVGH Medical Center Chief Dr. Renelyn Tungol.
Itinatag sa pamamagitan ng Republic Act No. 11720 na nilagdaan para maging batas noong Abril 22, 2022, ang JVGH ay ang kauna-unahang pampublikong ospital sa lalawigan ng Bulacan na pinatatakbo ng DOH.
Sa nasabing okasyon, tumanggap ang JVGH ng kanilang certificate of accreditation mula sa PhilHealth bilang isang primary healthcare facility.
Pinondohan ng DOH central office ang P40 milyong halaga ng pagpapatayo ng pasilidad sa ikatlong palapag ng ospital sa pamamagitan ng Health Facilities Enhancement Program ng ahensiya.
Sa sukat na 9,425 square meters, ang JVGH ay ang una ring public hospital sa Bocaue na may 81-bed capacity. Ang buong lote ay donasyon ng pamilya Villanueva at ipinangalan sa kapatid ng senador na si Joni Villanueva, nagsilbing alkalde ng Bocaue, na pumanaw noong Mayo 28, 2020.
“We hope Mayor Joni’s character and traits will guide JVGH staff to always provide quality service to those in need of healing and recovery,” pagtatapos ng senador. (UnliNews Online)
