CAMP OLIVAS, Pampanga — Dead on arrival ang mag-ina habang sugatan ang isa pang anak na babae nang aksidente ito mabundol ng isang dump truck ang sinasakyan nilang motorsiklo sa Baranday Niugan, Angat, Bulacan noong Lunes ng umaga (June 17).
Base sa ulat na nakarating kay Brig. Gen. Jose Hidalgo Jr., PRO3 regional director, kinilala ang mga namatay na biktima ng insidente na sina Rosemarie De Leon, 24 anyos at ang anak nitong 7 taong gulang na si Princess habang sugatan ang 2 taong gulang na si Angel.
Sa inisyal na imbestigasyon ng Angat police, binabaybay umano ng motorsiklo lulan ang mga biktima, na may plakang 947 QYK, ang kahabaan ng Gen. Alejo Highway sa Brgy. Niugan, Angat, Bulacan bandang alas-9:30 ng umaga nang aksidente itong masagi ng isang 10-wheeler dump truck, na may plakang ASA 9255.
Tumilapon ng ilang metro ang mga biktima ng aksidenteng masagasaan ng naturang dump truck na minamaneho ni Paulino De Leon Jr, residente ng Dizon Compound, Payumo St., Barangay Bangkal, Norzagaray.
Mabilis na rumesponde ang Angat Rescue Team at isinugod ang mga biktima sa Castro Medical Hospital sa Lungsod ng Baliwag kung saan idineklarang dead on arrival ang dalawa habang ang 2 taong gulang na bata ay kasalukuyang nasa masusing gamutan.
Kasalukuyang nasa kustodiya ng Angat police ang driver ng naturang killer truck habang inihahanda ang mga kasong kakaharapin nito. (UnliNews Online)
