PAMPANGA — Dalawang batang magkapatid ang natagpuan nitong Lunes (July 8) ang wala nang buhay sa loob ng isang abandonadong sasakyan sa garahe ng isang punerarya sa bayan ng Sto. Tomas, lalawigan ng Pampanga.
Batay sa naging ulat kay Police Regional Office 3 Director Brig. Gen. Jose Hidalgo Jr., ang mga biktima ay kinilalang sa mga alyas na “Ben”, 5 taong gulang at “Cesar”, 6, mga residente ng Bgy. Moras dela Paz sa Sto. Tomas.
Sa report ni Santo Tomas Municipal Police Station chief, P/Cpt. Jester Calis, bandang alas- 3:30 ng hapon nitong Lunes (July 8) nang madiskubre ang bangkay ng magkapatid sa loob ng sirang kotse sa harap ng Teng Funeral Services sa Purok 6 kotse sa Brgy. Moras dela Paz sa nasabing lalawigan.
Huling nakitang buhay ang mga biktima noong Sabado ng hapon ng Hulyo 6.
Ayon kay Calis, habang nanunungkit umano ng sampalok ang isang lalaki ay nakaamoy ito ng masangsang na amoy mula sa nakaparadang kotse.
Dahil dito ay nagpasyang usisain ng lalaki kung ano ang nangangamoy sa loob ng kotse at nang kaniyang silipin ay bumulaga sa kaniya ang bangkay ng batang magkapatid.
Agad namang ipinaalam ng naturang lalaki sa pulis.
Sinabi ng ina ng biktima sa mga imbestigador na inakala niyang kasama ng kanyang mga anak ang kanilang ama na nakatira sa kalapit na barangay.
Patuloy sa kasalukuyan ang isinasagawang imbestigasyon ng mga kapulisan at isinailalim na rin sa pagsusuri ng SOCO ang mga labi para malaman ang dahilan ng pagkamatay ng dalawang bata. (UnliNews Online)
