LUNGSOD NG MALOLOS — Dead on arrival ang isang kapitan ng barangay sa bayan ng Angat, Bulacan matapos barilin ng riding-in-tandem sa Sitio Tugatog, Brgy. Marungko Sabado ng umaga (Aug. 3).
Sa ulat na isinumite kay Brig. Gen. Jose Hidalgo Jr., PRO3 regional director, kinilala ang biktima na si Wenceslao Bernardo, barangay chairman ng Marungko, Angat, Bulacan.
Sa inisyal na ulat, nagsasagawa ng isang clean-up drive ang biktima kasama ang kanyang mga ka-barangay dakong alas-6:30 ng umaga sa Sitio Tugatog, Barangay Marungko sa nasabing bayan nang dumating ang dalawang hindi pa nakikilalang suspek na sakay ng kulay itim na Yamaha Aerox na motorsiklo na walang plaka.
Agad na binaril ng backrider ang biktima ng dalawang beses sa likod ng kanyang ulo.
Matapos ang insidente ng pamamaril, agad na tumakas ang mga suspek patungo sa direksyon ng bayan ng Bustos.
Isinugod ng mga bystanders ang biktima sa Twin Care Hospital ngunit idineklara itong dead on arrival ng attending physician.
Agad na nagsagawa ng dragnet at follow-up operation ang lokal na pulisya para sa posibleng pagdakip at pagkakakilanlan ng mga suspek habang hiniling sa Bulacan Forensic Unit na iproseso ang pinangyarihan ng krimen. (UnliNews Online)
