LUNGSOD NG MALOLOS, Bulacan — Patay ang isa sa dalawang robbery suspects, na nangholdap sa isang dental clinic sa nasabing lungsod noong Friday (Sept. 13) matapos na makaengkuwentro ng mga pulis sa follow-up operation.
Sa ulat na isinumite kay Col. Satur Ediong, Officer-In-Charge ng Bulacan Police Provincial Office, dalawang suspek na kapwa armado ng baril at puwersahang pinasok ang isang dental clinic sa Barangay Liang at tinangay ang dalawang iPhone at isang Gucci bag na naglalaman ng P2,000 in cash at agad na tumakas matapos ang insidente ng pagnanakaw.
Agad namang rumesponde ang mga operatiba ng Malolos City Police Station matapos makatanggap ng ulat at sa pamamagitan ng CCTV footages ay nakilala ang isa sa mga suspek na si alyas Ram.
Ang dragnet at follow-up operation na isinagawa ng Malolos City Police ay humantong sa pag-neutralize kay alyas Ram matapos manlaban sa pag-aresto.
Ang pangalawang suspek, na hindi pa nakikilala, ay nakaiwas sa pagdakip sa pamamagitan ng puwersahang sumakay ng motorsiklo at tumakas patungo sa bayan ng Hagonoy.
Nagsasagawa pa ng follow-up operation ang mga operatiba ng Malolos City Police para madakip ang natitirang suspek. (UnliNews Online)
