Nina Verna Santos at Allan Casipit
LUNGSOD NG MALOLOS –“Malaki o maliit mang negosyo ay malaki ang naiambag sa ating patuloy na pag-unlad. Nawa’y ipagpatuloy natin na maitampok ang trabaho at produktong Tatak Bulakenyo sa ating bansa at sa buong mundo. Let’s go bigger for BUFFEX. Palakihin pa natin para sa BUFFEX. Palaguin pa natin para sa Singkaban at palawigin natin para sa Bulacan!”
Ito ang mensahe ni Gob. Daniel R. Fernando sa engrandeng paglulunsad ng 2024 Bulacan Food Fair and Exposition (BUFFEX) 2024 ng Bulacan Chamber of Commerce and Industry at ng Pamahalaang Panlalawigan ng Bulacan na ginanap sa The Pavilion, Hiyas ng Bulacan Convention Center dito.
Sa kabila ng masamang panahon, sinabi ni Fernando na ang BUFFEX 2024 ay muling naging matagumpay mula Setyembre 2-6. Napuno ang kaganapan ng napakaraming masasarap na pagkain, mga pangunahing serbisyo, mahahalagang oportunidad, at mga kaalaman na naglalayong itaguyod ang isang mas mahusay at mas maunlad na hinaharap.
“Patunay ang BUFFEX na walang anumang kalamidad o unos ang makapipigil sa atin upang patuloy na makasabay sa tawag ng panahon, at mayakap ang makabagong pamumuhay. This year, mas pinalawak pa po natin ang sakop ng BUFFEX. Magbubukas pa tayo ng mas maraming oportunidad sa ating mga kababayan na pangalagaan ang ating kalusugan… at paunlarin ang ating kaalaman at kakayahan pagdating sa pagluluto, pagtatrabaho at pagnenegosyo,” anang gobernador.
May temang BUFFEX 2024: Evolving Trends in Food Production and Food Service Industries, nagtakda ng entablado para sa limang araw na kaganapan na puno ng mga kapana-panabik na aktibidad. Nagkaroon ng pagkakataon ang mga kalahok na dumalo sa Flower Arrangement Seminar Workshop na pinamumunuan ng BulSU Hagonoy Campus, gayundin ang mga learning session sa “Innovation for MSMEs” at “Online Marketing and 3D Hologram Printing” ng DTI at TESDA Bulacan Day.
Kabilang sa iba pang tampok ang Awitan sa BUFFEX OPM Singing Contest, Zumbex, Exhibitor’s Videoke Challenge, Tribute to Bulacan Food Champions, Induction of new Bulacan Chamber of Commerce and Industry (BCCI) members, Cooking Demo ni Chef Arlo Andrei Aniag ng Taverna ng Bahay na Tisa at DFMI Chairman Athenie R. Bautista, at ang Paglulunsad ng BCCI Souvenir Program – Bulacan Business Ventures.
Naging pangunahing tampok din sa BUFFEX ang Sponsors’ Time na kinabibilangan ng Leticia’s Garden Resort and Event’s Place, Freeway Motor Sales of Baliuag Corporation, Aling Ilah’s Sweets and Delicacies, Seven C Food Corporation, JMV Design Works, Kikkoman, Calle Jose, Baliwag Eye Clinic, Manuela Gonzales Concrete Pipes, Archer Realty and Development Corporation, Asialink Finance Corporation, Converge, Big Ben, The Hungry Pita, Northwin Global City, San Miguel Corporation, Tiger Gaz Corporation, PAGCOR, Mesa Alta Resto & Events Venue, at Royal Crest Cement Corporation na nagpakita ng kanilang suporta.
Nagkaroon din parangal para sa Best Booths kung saan kinilala ng BCCI ang Remiks FD Food Trading sa unang pwesto, Bausa Integrated Farm and Training Center, Inc. sa pangalawang pwesto at Arbela Food Products Marketing sa ikatlong pwesto. Para naman sa Best Dressed Booth LGU Category, ang mga munisipalidad ng Bustos, Pulilan, at San Miguel ang nagwagi para sa una, pangalawa at pangatlong pwesto ayon sa pagkakasunod-sunod.
Ang tatlong nangungunang LGU best seller sa kamakailang kumpetisyon ay ang mga Lungsod ng Baliwag at Malolos, at ang Munisipyo ng San Miguel, para sa una, pangalawa, at ikatlong puwesto habang ang nangungunang tatlong MSME sellers naman ay ang Sta. Maria Dairy Division of Catmon MBC, Taverna by Bahay na Tisa and Aling Ilah’s Sweet and Delicacies na nakakuha ng una, pangalawa, at pangatlong pwesto, ayon sa pagkakabanggit.
Bukod dito, kinilala at ginawaran ng BCCI ang Bulacan Food Champions: Ka Flor’s Carinderia at Route 95 Diner sa Lungsod ng Malolos, at Orante’s Floating Restaurant sa Calumpit. Binigyan din ng special citations ang Bancheto Food Tourism (City Government of Malolos), Pamanang Kaluto (Culinary Heritage), Ashley’s D’ Original Crunchy Butcheron ATBP of Marilao (Best Selling), at Susan’s Lugawan since 1985 (Arc Gatchalian Restaurant) sa Guiguinto.
Dagdag pa dito, itinanghal na kampeon si Angela Marie Cabela, isang mag-aaral mula sa Balagtas Central School sa Awitan sa BUFFEX OPM Singing Contest (Elementary). Sumunod sa kanya ang first runner-up na si Prince Mark John A. Gonzales mula sa San Jose, Paombong Elementary School, at ang second runner-up na si Kylie I. Enriquez mula sa Francisco Balagtas Memorial School.
Sa isa pang kapana-panabik na kumpetisyon, inangkin ng Power Pump Girls ang titulo ng kampeonato sa Zumba sa BUFFEX competition. Nakuha ng Dos Dynamix ang unang puwesto, kasama ang Zumba Mixstar na nakakuha ng pangalawang puwesto.
