LUNGSOD NG MALOLOS, Bulacan — Katuwang ang tanggapan ni Cong. Danny A. Domingo ng Bulacan 1st District, nakapagbaba ng tulong pinansyal sa ilalim ng Ayuda sa Kapos ang Kita Program (AKAP) ang Department of Social Welfare and Development (DSWD) sa mga unang batch ng benepisyaryo na mula sa naturang lungsod.
Umabot sa 1,726 Maloleño ang nakatanggap ng tig-P3,000 na tulong sa pay-out ng AKAP na isinagawa sa Malolos Sports Convention Center.
Nagmula sila sa paunang 25 na barangay sa Malolos na nagsumite ng listahan para sa unang batch ng mga benepisyaryo ng AKAP. Binigyan ng pagkakataon ang bawat Punong Barangay na magpasa ng hanggang tig-80 na pangalan at detalye ng residenteng lubos na nangangailangan at kwalipikadong makatanggap ng AKAP.
Layunin ng AKAP na magbigay ng tulong sa mga Pilipino na itinuturing na minimum wage earners, mahihirap, near poor, at mga nasa informal economy na naaapektuhan ang pang-araw-araw na kabuhayan dulot ng pabago-bagong sitwasyon ng ekonomiya.
Nagpapasalamat si Cong. DAD sa Pamahalaang Nasyonal at sa DSWD sa pagsasagawa ng programang ito, gayundin sa bumubuo ng Pamahalaang Lungsod ng Malolos at bawat opisyal ng Sangguniang Barangay na tumulong sa pagtukoy ng mga nararapat na benepisyaryo. (UnliNews Online)
